Sońǵı jılları oqıw procesiniń sapasın hám dárejesin túp-tiykarınan jaqsılaw, muzıka kórkem óneri tarawında dúnyanıń jetekshi joqarı bilimlendiriw mákemeleri, dóretiwshilik orayları, belgili ilimpaz-alımlar menen birge islesiwdi jolǵa qoyıw, sonıń ishinde, sırt el qánigelerin elimizge mirát etiw baǵdarında bir qatar jumıslar ámelge asırılmaqta.
Usı tiykarda búgin Qaraqalpaqstan Respublikası Joqarı bilimlendiriw, ilim hám innovaciyalar ministri A.Ayapov, Berdaq atındaǵı Qaraqalpaq mámleketlik universiteti professorı, filologiya ilimleriniń doktorı Q.Orazımbetov hám Ózbekstan mámleketlik kórkem óner hám mádeniyat institutı Nókis filialı direktorı w.w.a. Q.Yusupovlar Vengriya Respublikasında xızmet kórsetken artist, túrkolog ilimpaz Agoch Gergey basshılıǵındaǵı miymanlardı qabıl etti.
Vengriyalı ilimpazdıń bul saparı mámleketlerimiz arasındaǵı mádeniy baylanıslardı bunnan bılay da bekkemlew, Joqarı oqıw orınları, texnikumlar hám ilimiy oraylar arasında tikkeley birge islesiwdi jolǵa qoyıw, birgeliktegi izertlewler ótkeriw, professor-oqıtıwshılar hám studentler almasıwın jolǵa qoyıw, sonday-aq, JOOlar turmısı menen jaqınnan tanısıw hám sheberlik sabaqların ótkeriw maqsetinde shólkemlestirildi.
