Ellikqala Ábiw Áliy ibn Sina atındaǵı Jámietlik salamatlıq texnikumında Ellikqala rayonı prokurorı Muzaffar Atajanov hám rayonlıq IIB baslıǵı Bakbergen Shaxanovlardıń qatnasıwında texnikum jasları menen ushırasıw ótkerildi.
Ushırasıw dawamında jaslar arasında huqıqbuzarlıqlardıń aldın alıw, nızamǵa húrmet ruwxın qáliplestiriw, jaslardı watansúyiwshilik hám juwapkershilik ruwxında tárbiyalaw máseleleri dodalandı. Sonday-aq, studentlerge internet tarmaǵınan durıs paydalanıw, jat ideyalar tásirine túsip qalmaw hám jınayachılıqtıń aldın alıw boyınsha túsindiriw jumısları alıp barıldı.
Ilaj dawamında mámleketimizde jaslar ushın jaratılıp atırǵan keń imkaniyatlar, sonıń ishinde, jaslar isbilermenligin qollap-quwatlaw, jeńilletilgen kredit hám subsidiyalar ajıratıw, startap joybarlardı qarjılandırıw, “Jaslar biznes inkubatorı” jumısın jolǵa qoyıw, “Keleshek isbilermeni” hám “Jas isbilermenler” baǵdarlamalarına toqtap ótildi.
Sonıń menen birge, texnikum oqıwshıları ushın startap joybarlar shólkemlestiriwge ruxsat beriliwi, kásip-óner laboratoriyaların shólkemlestiriw, sırt elde jumıs islew imkaniyatın beretuǵın “Work and Travel” baǵdarlamaları, jaslardı isbilermenlikke oqıtıw, volontyorlıq háreketlerin qollap-quwatlaw, grant hám jeńilletilgen ssudalar ajıratıw sıyaqlı imkaniyatlar haqqında túsinikler berildi.
Ushırasıw ashıqtan-ashıq sóylesiw tárizinde ótip, studentler ózlerin qızıqtırǵan sorawlarǵa juwapker basshılardan juwap aldı. Bul ilaj jaslardıń huqıqıy sanası hám mádeniyatın arttırıw, olardı bilimli, intaker jáne jámietlik turmısta belsene qatnasatuǵın shaxslar etip tárbiyalawǵa xızmet etti.