Бүгин Бердақ атындағы Қарақалпақ мәмлекетлик академиялық музыкалы театрында Нөкис қәнигелестирилген мәденият мектебиниң 65 жыллығына арналған илаж болып өтти.
Илажға Қарақалпақстан Республикасы Жоқарғы Кеңеси ҳәм Министрлер Кеңеси, Жоқары билимлендириў, илим ҳәм инновациялар, Мәденият, Мектепке шекемги ҳәм мектеп билимлендириў министрликлерниң ўәкиллери, сондай-ақ, белгили дөретиўшилер, көп жыллар даўамында мәмлекетлик ҳәм жәмийетлик жумысларда ислеген нураныйлар, мәмлекетимиздеги бир қатар жоқары оқыў орынлары басшылары, профессор-оқытыўшылар ҳәм студентлер, кең жәмийетшилик ҳәм ғалаба хабар қуралларының ўәкиллери қатнасты.
Шығып сөйлеўшилер өз сөзинде: бул оқыў орны шөлкемлестирилген жыллардан баслап республикамыз ушын жоқары сападағы профессионал кадрлар таярлап берип келген бирден-бир оқыў орны есапланды. Солардың ишинде Қарақалпақстан республикасы «Айқулаш» ансамблине ойыншылар, Өзбекстан Мәмлекетлик Филармониясы Қарақалпақстан бөлими халық сазлары оркестрине сазенделер, Бердақ атындағы қарақалпақ мәмлекетлик академиялық музыкалы театрына актёр-актрисалар, симфониялық оркестрге сазенделер, хор ҳәм балет артистлерин, Қарақалпақ мәмлекетлик жас тамашагөйлер ҳәм Қарақалпақ мәмлекетлик қуўыршақ театрларына артистлер, қалалық ҳәм районлық мәденият мекемелерине хызметкерлер, китапханашылар, балалар музыка көркем өнер ҳәм улыўма билимлендириў мектеплерине оқытыўшы қәнигелер таярлап берип келди.
Соның ушын да Нөкис қәнигелестирилген мәденият мектеби халық аўзында ҳәттеки, «Қарақалпақстанның консерваториясы» деген дәрежедеги абройға ийе болды. Оқыў орнын 65 жыл даўамында 15 000 нан аслам қәнигелер питкерип шығып, олар бүгинги күнде республикамыздың жәмийетлик ҳәм руўхый турмысында өз белсендилиги менен хызмет ислеп келмекте ҳәм халқымыздың мәдениятын, көркем өнерин дүньялық көлемде танытыўда, сондай-ақ оны жоқары дәрежеде раўажландырыўда салмақлы үлес қоспақта. Соның менен бирге усы оқыў орнын питкерген кадрлардың бир қатары қоңсылас республикаларда, Европа ҳәм басқа да мәмлекетлерде де өз жумысларын даўам етпекте. Нөкис қәнигелестирилген мәденият мектеби 65 жыл даўамында халқымыздың көркем өнери менен мәдениятына ҳәм усы тараўға байланыслы илим ҳәм билимин раўажландырыўда салмақлы үлес қосқан оқыў орны екенлигин атап өтилди.
Салтанатлы кешеде мийманымыз Өзбекстан мәмлекетлик көркем өнер ҳәм мәденият институты ректоры, профессор Нодирбек Сайфуллаев ҳәмде Қарақалпақстан Республикасы Жоқарғы билимлендириў, илим ҳәм инновациялар министри А.Аяпов та шығып сөйлеп, илаж қатнасыўшыларын Нөкис қәнигелестирилген мәденият мектебине 65 жыл толыўы менен қутлықлады ҳәм естелик саўғаларын тапсырды.
Салтанатлы илажда бир топар Нөкис қәнигелестирилген мәденият мектебиниң пидайыларына Қарақалпақстан Республикасыныӊ ҳүрметли атақлары, көкирек белгилери ҳәм саўғалар тапсырылды.
Илаж көркем өнер шеберлери тәрепинен таярланған концерт бағдарламасы менен даўам етти.
